- (كائن أرضى )
- باحلم وأعدى بحور
- رغم الجناح مكسور
- والدنيا مش وردى
- ماسك فى ايدى بخور
- راسم طريق من نور
- وباخطى وباعدى
- قالوا الحياة فى رغيف
- قلت كلام تخاريف
- مش هعرفه فى عهدى
- لو كان ربيعى خريف
- وشتايا جه فى الصيف
- هفضل كائن أرضى
- حلمه ما هوش ممنوع
- نفسه ما هوش مقطوع
- من شيشة وسيجارة
- يحلم فى عز الجوع
- يرسم لشمسه سطوع
- والعجلة...... سيارة
- يمكن يعيش فى ما فيش
- ياكل الخيال تحابيش
- وفى بطنه مية غارة
- بس الخيال هيعيش
- يرسم جناح من ريش
- ويكونله طيارة
- ياللى تقول ممنوع
- إحلم فى عز الجوع
- لو حتى مش مرضى
- إصرخ بصوت مسموع
- وامشى براس مرفوع
- قول ماشى على أرضى
- ده انت صاحب أملاك
- أرضك سماك وهواك
- واحلامك الوردى
- يمكن معاندة معاك
- او حتى مش سمعاك
- خلى الخيال .......هندى
- إنت كائن أرضى
- #محمود_المزين
الثلاثاء، 7 فبراير 2017
(كائن أرضى )\\\\\#محمود_المزين
الاشتراك في:
تعليقات الرسالة (Atom)
ليست هناك تعليقات:
إرسال تعليق