(اعذرينى )
واعذرينى لما كنت
أرفض أنام
وإنى ألعب كل حبة
وإنى ما أسمعش الكلام
وانى كنت دايما أطلب
عمرى مرة ما شوفت كام
كنتى شايلة فوق همومك
كنت عايش والسلام
واعذرينى لما كنت
أشخط وأقول
اصحى يا امه انا مش صغير
انا خط شنبى وفيا طول
كنت حابب انى أغير
كنت ليه إنسان عجول ؟
وكنتى ليه شايفانى عيسي
وكنت مش شايفك بتول ؟
ده انتى وصية من الرسول
اعذرينى لو كتبت
انا مش هقول
عن سهرتك يوم جنب منى
عن مشاكلى والحلول
عن صبايا وصغر سنى
عن شقاكى والحمول
اعذرينى يا امه انى
كنت بانسى كل دول
كنت فاكر بس انى
بره حضنك هابقى راجل
الهموم هتخف منى
كنت نار تغلى فى مراجل
صدقينى يا امه انى
لما غبت فى ليلة عنك
الحياة مرت كأنى
ضيف غريب وخلاص مهاجر
فاعذرينى لما قولت
فى بعدى عنك هبقى راجل
لما غبت فى يوم خسرت
فاعذرى الابن المهاجر
وعد منى انى تبت
لو سنين هتعب وأعافر
مش هنساكى يا أحلى ست
ولو نسيتك هابقى كافر
#محمود_المزين
ليست هناك تعليقات:
إرسال تعليق